Во Белград се одржа работна и студиска средба меѓу Институтот за акредитација на Република Северна Македонија (ИАРСМ) и Акредитациското тело на Србија (АТС), со цел продлабочување на меѓусебната соработка и унапредување на размената на стручни знаења, искуства и добри практики во областа на акредитацијата.
Средбата претставува продолжение на иницијативата за воспоставување поинтензивна и непосредна комуникација меѓу двете национални акредитациски тела, која беше поттикната во текот на 2025 година преку заеднички средби и контакти на европско и меѓународно ниво.
Во текот на посетата беше реализиран отворен и конструктивен стручен дијалог, при што беа споделени искуства од работењето на двете институции, актуелни практики и предизвици во областа на акредитацијата, како и идеи за понатамошно унапредување на соработката. Посебен акцент беше ставен на значењето на непосредната размена на искуства и воспоставувањето одржливи форми на професионална соработка.
Ваквите средби се значаен придонес кон јакнењето на довербата и партнерството меѓу националните акредитациски тела и создаваат можности за заеднички активности, размена на експертиза и понатамошно усогласување со современите европски и меѓународни практики во акредитацијата.
ИАРСМ упатува благодарност до раководството и тимот на АТС за гостопримството, професионалната организација и отворениот пристап, кои придонесоа за успешната реализација на работната средба и создадоа позитивна основа за продолжување на воспоставената соработка.
Како следен чекор е предвидена возвратна посета на претставници на АТС во Северна Македонија, со што ќе продолжи иницијативата за воспоставување традиција на редовни стручни средби. Во перспектива, ваквата соработка може да прерасне и во пошироки регионални иницијативи и средби меѓу акредитациските тела од Балканот.
ИАРСМ и АТС остануваат посветени на градењето долгорочна и продуктивна соработка заснована врз професионализам, доверба, меѓусебно почитување и споделување на знаењето, во интерес на натамошниот развој на акредитацијата во регионот.
ИАРСМ во иднина планира да продолжи со организирање вакви стручни средби и со други акредитациски тела од регионот и пошироко, со цел натамошно унапредување на размената на знаења, искуства и добри практики и зајакнување на професионалната соработка на меѓународно ниво.
